Dalilan Da Ya Sa Muka Sauya Wa Jami'ar Jihar Bauchi Suna Zuwa Sa'adu Zungur -Kwamishinan Ilimi

 

Jami'ar Sa'adu Zungur, Gadau

An sauya wa Jami’ar Jihar Bauchi da ke Gadau suna zuwa Jami’ar Sa’adu Zungur. Wannan sanarwa ta fito ne a wata takardar da Kwamishinan ilimi na Jihar, Dakta Aliyu U. Tilde ya sanya ma hannu a jiya Laraba 10 ga watan Fabrairu 2021.

Takardar ta bayyana cewa, an sauya sunan Jami’ar ne domin raya sunan marigayi Malam Sa’adu Zungur, ɗan asalin Jihar Bauchi wanda yana cikin manyan da suka yi fafutikar samun ‘yanci, kuma ɗaya daga cikin ‘yan gwagwarmayar siyasa da manufofinsu na ci gaban jama’a ta sauya yanayin siyasar arewacin Nijeriya.

Takardar ta godewa Gwamnan Jihar, Sanata Bala Muhammad wanda ya taimaka wa ma’aikatar ilimin wurin cika alkawarin da ta yi ga wakilan iyalan Malam Mu’azu na tabbatar da ci gaba da raya sunan marigayin.

A ƙarshe, takardar ta bayyana wannan rana a matsayin babbar rana a tarihin ilimi a jihar Bauchi.