‘Yan Bindiga Sun Kashe Mutum Biyu A Kaduna

 


Hukumomin tsaro a Kaduna sun tabbatar da mutuwar mutum biyu sakamakon harin da ‘yan bindiga suka kai a kauyen Akwando dake karamar hukumar Kachia a jihar, inda suka kashe wani Dattijo mai suna Dikko Bagudu.

A sanarwar da kwamishinan lura da harkokin tsaron cikin gida ya fitar, Samuel Aruwan, ya ce ‘yan bindigar sun tare titin Sabon Birni zuwa Rikau dake karamar hukumar Igabi inda suka kashe wani mutum mai suna Ibrahim Abdulmumin, wanda yake mazaunin kauyen Rikau ne. Inda kuma suka raunata wani mutum mai suna Sahabi Shafiu, wanda yake da ne ga Sarkin kauyen na Rikau.

Rahotanni sun ce wadanda lamarin ya shafa suna kan hanyar dawowa ne daga kasuwar mako-mako dake ci a Sabon Birni, inda ‘yan bindigar suka tare su a hanya.

Gwamnan Kaduna, Nasir El-Rufai ya nuna damuwarsa bisa wannan lamarin, inda ya mika ta’aziyyah ga iyalan wadanda lamarin ya shafa. Tare da yin addu’ar samun lafiya ga wanda aka raunata. 

Post a Comment

0 Comments