Yadda Fashewar Bom Ya Raunata Yara Bakwai A Kaduna, Inji Aruwan Kwamishinan Tsaro

 

Daga Muhammad Farouk 

Gwamnatin jihar Kaduna ta bayyana cewa yara bakwai sun raunata sakamakon fashewar wani bom bisa tsautsayi da ya auku a karamar hukumar Igabi dake jihar.

 “hukumomin tsaro sun bayar da rahoton fashewar wani bom bisa tsautsayi da aka sanya a Unguwan Mangwaro dake karamar hukumar Igabi,” kamar yadda sanarwa daga Kwamishinan lura da tsaron cikin gida, Samuel Aruwan ya tabbatar.

“rahoton ya bayyana cewa wadansu yara ne suke wasa a yankin inda suka dauko abin fashewar da aka binne a wata gona a kusa da su, inda suka rika wasa da abin ba tare da sun san ko mene ne ba. A yayin wasan ne, bom din ya fashe bisa tsautsayi a kusa da gidansu”, inji Aruwan.  

 “dukkanin yaran bakwai sun samu rauni sakamakon fashewar bom din, inda yanzu haka suke asibitin koyarwar na Jami’ar Ahmadu Bello dake Shika”, ya tabbatar.

Da yake bayyana damuwarsa, gwamna Nasir El-Rufai ya ce lamarin ya zo da sauki, tunda yaran da suka raunata suna karbar magani yanzu haka.

Ya nemi hukumomin tsaro da su yi bincike kan lamarin, sannan ya shawarci al’umma da su zama masu sanya ido kan dukkanin abin da suka gani ba su gane masa ba a ko’ina ne.

An sanar da hukumomin tsaron kan lamarin domin ganin sun gudanar da bincike domin dakile aukuwar hakan a gaba.

An kuma nemi al’ummar jihar Kaduna da su tuntubi dakin tsaron jihar Kaduna domin bayyana musu duk wani bayani kan wani abin fashewa da suka tsinta a fadin jihar ta hanyar wadannan lambobi 09034000060 da 08170189999.