Rundunar Soja Ta Ce Ta Kashe 'Yan Bindiga Biyar A Jihar Katsina

 

 

'Yan fashin daji aƙalla huɗu ne suka mutu bayan wata fafatawa da suka yi da dakarun rundunar Hadarin Daji ta sojan Nijeriya a Jihar Katsina, a cewar mai magana da yawun rundunar kamar yadda rahoton BBC ya labarto.

Wata sanarwa da Birgediya Janar Mohammed Yerima ya fitar a yau Asabar ta ce dakarun sun yi nasarar kashe miyagun ne yayin wani samame ranar Alhamis a garin Marina na Ƙaramar Hukumar Safana.

Wasu 'yan bindigar sun tsere da raunukan harbin bindiga, a cewar sanarwar, yayin da dakaru suka ƙwace babura da kuma bindigar AK-47 guda biyu.

Ya ce an ga tawagar 'yan bindigar ce ɗauke da shanun da suka sata kuma nan take sojoji suka far musu a kusa da garin Batsari zuwa Runka.

A gefe guda kuma, dakarun rundunar haɗin gwiwa ta Operation Puff Adder ta kashe ɗan fashi ɗaya tare da ƙwace bindigarsa ƙirar AK-47 a Ƙaramar Hukumar Kanƙara.

Kakakin 'yan sandan Katisna, SP Gambo Isa, ya ce dakarunsu ne suka far wa miyagun bayan sun kai wa ƙauyukan Matsiga da Masaku hare-hare a daren Juma'a, inda suka kashe ɗaya daga cikinsu.