Ciroman Zazzau Ya Ce Sarkin Zazzau ‘Jikan Wanzami’ Ne

 


Daga Muhammad Farouk

Ciroman Zazzau Saidu Mailafiya da Sarkin Zazzau Ahmed Nuhu Bamalli, ya cire wa rawaninsa bisa zarginsa da cewa ba ya yi wa Sarkin biyayya, ya bayyana Sarkin Zazzau, Ahmed Nuhu Bamalli da cewa Kakansa  ‘wanzami’ne, kuma tsatsonsa ba Mallawa bane kamar yadda majiyarmu ta tabbatarwa Jaridar MADOGARA

Sarkin Zazzau, Ahmed Nuhu Bamalli, ya tube Ciroman Zazzau, Saidu Mailafiya mai shekara 84 a duniya bisa zarginsa da rashin biyayya da kuma kalubalantar tsatson Sarkin.

Mailafiya, dan Sarki ne, kuma yana da shekaru wanda ya fito daga tsatson Mallawa, tunda farkon nadin Sarkin Zazzau din Ahmed Nuhu Bamalli, ya ki mika mubaya’a ga sabon Sarki, sai dai daga bisani bayan bibiya da sanya baki, ya je ya mika mubaya’arsa amma ya zare kansa daga kai ziyara a kai a kai ga sarkin bisa zargin cewa sabon Sarkin ba tsatson Mallawa bane.

Majiyarmu ta tabbatar mana cewa; Mailafiya ya zargi cewa sabon Sarkin na Zazzau, Ahmed Nuhu Bamalli, kakansa ‘wanzami’ ne, wanda ya ce shi ne ma wanda ya yi masa shayi (kaciya) lokacin da yake karami.

Sai dai masana tarihi a masarautar da littafan tarihi sun yi watsi da zargin tsohon Ciroman Zazzau din, duk da hakan bai sanya Mailafiya ya yi watsi da zargin da ya yi ba.

Majiyarmu daga fada ta labarto mana cewa; cire Ciroman Zazzau din bai dace, domin da Sarkin ya yi hakuri da halayyar Ciroman Zazzau din, domin a cewarsu har mahaifin Sarkin Zazzau na yanzu wato Nuhu Bamalli ya koma ga Allah, yana da matsala ta rashin yin biyayya da tsohon Sarkin Zazzau Marigayi Shehu Idris.

 “Marigayi Nuhu Bamalli shima ba ya gudanar da ayyukan masarauta tun bayan mubaya’ar da ya yi wa Marigayi Shehu Idris. Marigayi Shehu Idris ya manta da wannan matsalar, har ya aurar da ‘yarsa ga wannan sabon sarkin wanda yake da ne ga marigayi Nuhu Bamalli, sannan marigayi Shehu Idris ya bai wa ‘ya’yan marigayi Nuhu Bamalli guda biyu sarauta”, majiyarmu ta tabbatar.

A wani labarin kuma, Sarkin na Zazzau, Ahmad Nuhu Bamalli ya amince da nadin Shehu Dansidi Bamalli, Hakimin Makera a matsayin sabon Ciroman Zazzau.

Sannan Sarkin ya amince da nadin Shehu Mailafiya Bamalli, dan uwa ga tubabben Ciroma daga sarautar Makama Gado Da Masu Zazzau zuwa Barden Zazzau.

Har wala yau Halliru Nuhu Bamalli shi ya zama Makama Gado da Masu Zazzau.

 

Post a Comment

0 Comments