IPOB Sun Hallaka Sojoji Biyu A Ebonyi

 


 Daga Muhammad Haruna

'Yan kungiyar IPOB  sun kashe sojoji guda biyu a daidai inda sojojin ke tsayawa a Timber Junction area dake karamar hukumar Afikpo North a jihar Ebonyi.

Jaridar The Nation ta labarto cewa; lamarin ya auku ne da misalin karfe tara na dare. “’yan bindigar sun yi awon gaba da kwanson harsasai na sojoji biyun da suka kashe”, inji majiyarmu.

Majiyarmu daga inda lamarin ya auku wanda ya nemi da a sakaya sunansa, ya labarta cewa; wadannan ‘yan bindigar sun isa mashigar sojojin ne a farar mota kirar Bas, a daidai lokacin da kuma sojojin suka tsare su a wurin domin bincikensu, kawai sai suka bude musu wuta.

A cewarsa, kashe sojojin ya haifar da tsoro da firgici a garuruwan Amasiri da Afikpo, domin mazauna garuruwan cikin tsoro da firgici musamman masu sayar da kayayyaki a wurin suka kwashe kayansu suka gudu gida.

 “lallai abin takaici ne da tashin hankali a wurin. An ce wadansu ne da ake zargin ‘yan bindiga ne wanda suka zo mashigar sojojin ta Timber Shade da ta hada garuruwan Ehugbo da Amasiri a farar mota kirar bas”, inji shi.

Ya ci gaba da cewa; “kamar yadda aka saba, sojojin suka tsayar da su domin bincike, tsayar da su ke da wuya suka budewa sojojin wuta, biyu daga cikin sojojin mace da na namiji suka rasu, sauran suka gudu”, ya tabbatar.

“wurin shiru yanzu kamar makabarta. Wurin yana da yawan cunkoson jama’a, amma yanzu ba kowa. Mafi yawan al’ummar kauyakun manoma da ‘yan kasuwa ne”, ya jaddada.

Ya kuma tabbatar da cewa; sakamakon abin da ya faru mutane da dama sun gudu gida. “a yanzu da nake magana da kai, ko’ina a kulle. Ko’ina shiru. Akwai tsoro a tsakanin mutane, dan uwana ina gaya maka duniya ta kawo karshe kawai”, ya bayyana cikin tsoro.

Ya zuwa hada rahoton nan, rundunar sojin Nijeriya ba su ce uffan ba a kai.

Post a Comment

0 Comments