Ku Yi Hattara Da Kasar Chana –Sakon Amurka Ga Kasashen Afrika

 

Sakataren harkokin wajen Amurka Antony Blinken ya gargaɗi  kasashen Afrika a kan rawar da Chana ke takawa a nahiyar, yayin da ya lashi takobin ƙarfafa ƙawancen Amurka da Nijeriya da kuma Kenya.

Sakataren Amurkan ya bayyana hakan ne a yayin ziyarar da ya kawo wa Nijeriya ta Intanet sakamakon kullen Korona da aka yi.

 Sakataren harkokin wajen Amurka Antony Blinken ya tattauna da shugabannin ƙasashen biyu kuma yana 'rangadi' a wasu wurare ciki har da asibitin tafi-da-gidanka da Amurka ta gina.

A lokacin da yake amsa tambayoyin wasu mata ƴan Afrika waɗanda suka yi karatu a Amurka, Mista Blinken ya ce yana fata ƙasashen Afrika za su ƙulla ƙawance cikin hikima.

"Ba mu ce kowa ya zaɓa tsakanin Amurka da China ba, amma muna ƙarfafa maku gwiwa kan ku riƙa yin tambayoyi masu tsauri, ku yi bincike da kyau sannan ku buƙaci gaskiya," a cewarsa kamar yadda BBC ta labarto.

Dangantakar da ke tsakanin Amurka da Chana na ƙara tsami, kuma wannan ya haifar da zuba jari a Afrika ta hnayar mayar da hankali kan albarkatun ƙasa.

Haka kuma, Blinken ya yi magana kan yadda ƙasashen Afrika da dama ke fama da nauyin bashin China da suka karɓa.

Ya ce ya kamata ƙasashen Afrika su riƙa tunani mai zurfi idan wasu ƙasashen suka shigo ƙasarsu don gina manyan ayyuka tare da zuwa da ma'aikatansu.

"Me ya sa ba sa bai wa mutanen ƙasar da za su zuba jarin ayyukan yi?" a cewarsa

A nasa ɓangaren, Shugaba Muhammadu Buhari a lokacin da yake magana da Blinken ya yi wa Shugaba Biden godiya bisa sassauta takunkumin da Trump ya sa wa ƴn Najeriya kan takardun shiga Amurkar.

Shugaba Buhari ya sha alwashin ƙarfafa ƙawance tsakaninsa da Amurka musamman a yankunan da ke fama fda matsalar tsaro ciki har da yankin Sahel.