Ramadan: Shaikh Zakzaky Ya Raba Kayan Abinci Ga Mabukata Da 'Yan Gudun Hijira


Daga Wakilinmu

Jagoran Harkar Musulunci a Nijeriya, Shaikh Ibraheem Zakzaky ya raba kayan abinci na miliyoyin naira ga mabukata domin watan Ramadan da aka shiga kamar yadda MADOGARA ta labarto.

Kayan abincin ya hada da buhun suga, shinkafa da kuma masara, gero an raba su a karkashin kulawar babban dansa, Muhammad Ibraheem Zakzaky.

Shaikh Zakzaky wanda gwamnatin Nijeriya ke ci gaba da rike shi har na tsawon shekaru shida tun bayan kashe mabiyansa da afka masa da sojojin Nijeriya suka a cikin watan Disambar 2015, ya bada umurnin a raba wadannan kayayyakin abincin ne ga ‘yan Nijeriya mabukata a cikin wannan wata na Ramadan domin saukaka musu.

Wakilinmu ya labarto mana cewa; an raba wadannan kayayyakin abincin ne a Zariya, garin Kaduna da kuma wadansu kananan hukumomi dake jihar ta Kaduna. Kuma wakilinmu ya labarto mana cewa; Shehin Malamin ya kwashe fiye da shekara 20 yana irin wannan ayyuka a duk lokacin watan Ramadan, kuma ya ci gaba da gudanar da hakan tun bayan kama da gwamnatin Buhari ta yi. “duk da tsare shi da matarsa da gwamnati Buhari ta yi bayan kashe dubban mabiyansa, ciki harda ‘ya’yansa uku, tare da rauni da yake jikinsa tare da kin bin umurnin kotu da gwamnati ta yi, amma hakan bai hana ya ci gaba da raba kayan abincin ba a duk watan Ramadan”, inji daya daga cikin masu rabon abincin.

Har wala yau masu rabon sun bayyana cewa Shehin Malamin ya yiwa musulmin dukkanin duniya fatan alheri tare da murnar shiga watan Ramadan tare da yin alkawarin ci gaba da yi musu addu’a a watan na Ramadan.

Daga cikin wadanda suka amfana da rabon kayan abincin harda masu gudun hijira a jihohin Zamfara da Katsina, wadanda suke baje a sansanin gudun hijira da dama a arewacin Nijeriya.

Akalla jihohi 13 ne suka amfana da wannan rabon, jihohin sun hada da; Sokoto, Kebbi, Katsina, Kano, Plateau, Nasarawa da Bauchi da sauran su.

Post a Comment

0 Comments