A Cikin Kwanda Daya Cutar Korona Ta Hallaka Indiyawa Fiye Da Dubu Hudu

 


Sabbin alkaluman da ma’aikatar lafiyar Indiya da ta fitar a yau Asabar, sun nuna cewar rayukan mutum fiye da dubu hudu annobar Korona ta lakume, yayin da wasu akalla dubu 401 suka kamu da cutar cikin kwana daya rak a kasar.

Karin mutanen dubu 4 da 187 da cutar ta kashe, ya sanya jumilar adadin mutanen da suka rasa rayukansu a dalilin annobar kaiwa dubu 238 da 270, yayin da jimillar wadanda suka kamu da ita ya kai kusan miliyan 22.

Karo na farko ke nan da adadin ya kai haka tun bayan barkewar annobar a kasar.

Sai dai kwararru sun yi gargadin cewa akwai yiwuwar adadin mutanen da cutar ta Korona ta kashe da kuma wadanda suka kamu da ita a kasar ta Indiya ya zarce na alkaluman da ake da su, gami da bayyana fargabar har yanzu annobar da ta sake barkewa karo na biyu ba ta kololuwa ba.

Tuni dai kwararrun Birtaniya suka bayyana damuwa kan sabon nau’in cutar Koronar da ya bulla a India, wanda suka ce yana da hatsari kamar yadda rahoton RFI ya tabbatar.


Post a Comment

0 Comments