Amnesty Ta Sake Caccakar Shugabannin Nijeriya Kan Gaza Kare Rayukan 'Yan Kasar

  Kungiyar kare hakkin dan Adam ta Amnesty International ta zargi gwamnatin Nijeriya da gazawa wajen daukar matakan kare rayuka da dukiyoyin...

 

Kungiyar kare hakkin dan Adam ta Amnesty International ta zargi gwamnatin Nijeriya da gazawa wajen daukar matakan kare rayuka da dukiyoyin ‘yan kasar, gazawar da Amnesty ta ce tana karawa miyagu kwarin gwiwar ci gaba da tafka ta’asa san ransu.

Amnesty International ta bayyana haka ne cikin wata sanarwa da ta fitar yayin bikin cikar ta shekaru 60 da kafuwa.

Rfi Hausa ta labarto cewa; a cewar Daraktan kungiyar ta kare hakkin dan Adam a Nijeriya Ossai Ojigho, kasar ta dade da tarihin fuskantar matsalar kasa magance take hakkin dan adam, kare rayukan da dukiyar ‘yan kasar, tauye ‘yancin fadin albarkacin baki da kuma rashin shugabanci na gari tun shekarar 1967.

Amnesty ta kara da cewar ci gaba da salwantar da rayukan jama’a ta hanyar yi musu kisan gilla da kuma sakacin gwamnati wajen murkushe miyagun tare da hukunta su, na ci gaba da zama barazana babba ga hakkin rayuwa a Nijeriya.

Kungiyar ta kuma koka kan yadda ‘yancin bayyana korafi ko ra’ayi ke fuskantar koma baya a kasar ta Nijeriya, sakamakon dakile damar mutane ta gudanar da zanga-zangar nuna bacin rai kan lamurran dake damunsu.

Wannan dai ba shi ne karo na farko da Amnesty International ke wallafa rahoton dake caccakar gwamnatin Nijeriya ba domin jan hankalinta kan kura-kuran da take tafkawa, yayin da su kuma hukumomin Nijeriyar ke maidawa kungiyar martanin kare kansu daga zarge-zargen da take musu, gami da yin watsi da wasu rahotannin da suke bayyanawa a matsayin marasa tushe.