Bayan Shekara 117 Jamus Ta Amince Ta Biya Diyya Kan Kisan Kiyashin Da Ta Yi A Namibia

 


Kwana daya bayan da shugaban Faransa Emmanuel Macron ya amince da kuskuren da kasarsa ta tafka a kisan kiyashin Rwanda, a karon farko kasar Jamus ta amince da aikata kisan kare dangi a Namibia a lokacin mulkin mallaka, inda ta yi alkawarin ba da tallafin kudi na sama da Yuro biliyan daya a matsayin diyya ga kasar dake Kudancin Afirka.

Turawan mulkin mallaka na Jamus sun kashe dubun dubatar kabilun ‘yan asalin Herero da Nama a wani kisan gillar da aka yi a shekarun 1904-1908 - wanda masana tarihi suka yi wa lakabi da kisan kare dangi na farko a karni na 20 da ya lalata dangantaka tsakanin Namibia da Jamus tsawon shekaru.

Duk da yake Berlin ta amince da lallai da sa hannun mahukuntar mulkin mallaka a ta'asar ta Namibiya, sai dai ta dage kan kin daukar alhaki kai tsaye da kuma watsi da batun biyan kudin diyya.

AMINCEWA KARON FARKO

To sai dai cikin sanarwa da ministan Harkokin Wajen Jamus Heiko Maas ya fitar ranar Juma’a ya ce; “yanzu sun amince tare da ambaton kalmar kisan kare dangi a hukumance”, inji shi.

Inda ya yaba da yarjejeniyar fahimtar juna da suka samu bayan kwashe sama da shekaru biyar suna tattaunawa da Namibia kan abubuwan da suka faru a yankin da Berlin ta rike daga shekarun 1884 zuwa 1915.

"Dangane wannan nauyi da tarihi ya nuna, da irin ɗabi'a na Jamus, za mu nemi gafara daga Namibia da zuriyar waɗanda aka cutar" don "ta'asar" da aka aikata, in ji Maas.

BIYAN DIYYA

Ministan ya ce, domin nuna karamci jamus za ta tallafawa Namibiya  da Yuro biliyan daya da miliyan 100 don sake ginata da ci gaban kasar.

Majiyar kusa ta yarjejeniyar ta ce, cikin shekaru 30 Jamus za ta biya kudin sannu a hankali, kuma dole ya soma da zuriyar Hereo da Nama kai tsaye.

-Rahoton RFI Hausa/MADOGARA


Post a Comment

0 Comments