Gwamna Zulum Ya Ce Ma'aikatan Agaji Na Karkata Kudaden Taimako

 


Gwamnan Jihar Borno Babagana Umara Zulum ya zargi Majalisar Dinkin Duniya da wasu kungiyoyin sa kai na kasashen duniya da karkata kashi 30 na kudaden da masu bada agaji ke samarwa domin tallafawa mutanen da rikicin Boko Haram ya rutsa da su a arewa maso gabashin kasar kamar yadda RFI Hausa ta labarto.

Zulum wanda ya yi wannan zargi lokacin da ya karbi Jakadun Amurka da Birtaniya a ofishinsa ya bukace su da su dinga sanya ido sosai kan kudaden da kasashen su ke bayarwa a matsayin agaji domin tallafawa mutanen dake bukatar taimako.

Gwamnan ya ce duk da yake suna gabatar da makudan kudade a matsayin agaji, amma kashi 30 na kudaden basa zuwa wajen mutanen da aka ware domin su, abin da ya sa ya zama wajibi a dinga bin irin wadannan tallafi sau da kafa domin sanin inda suke shiga.

Jakadiyar Amurka Mary Leonard da ta Birtaniya Catriona Laing sun gana da masu ruwa da tsaki wajen aikin agaji a Jihar Borno dangane da ayyukan da suke yi da kuma bukatun cigaba a yankin.

Jakadun biyu sun kuma ziyarci sansanonin ‘yan gudun hijira da cibiyar sojojin Nijeriya da kuma wasu ofisoshin ma’aikatan jinkai kafin ziyarar Gwamna Zulum.

Babban Jami’in Majalisar Dinkin Duniya a Nijeriya Edward Kallon ya jagoranci tawagar jakadun wadanda suka bayyana damuwa kan matsalar tsaron da ya addabi yankin da kuma illar da ya yiwa kasashen dake Yankin tafkin Chadi da suka hada da Kamaru da Nijar da kuma Chadi na sama da shekaru 10.

Majalisar Dinkin Duniya tace tashin hankalin da aka kwashe sama da shekaru 10 ana yi ya yi sanadin raba mutane sama da miliyan 3 da dubu 200 da matsugunan su, yayin da kusan miliyan 4 da rabi ke fuskantar barazanar yunwa da kuma kuncin rayuwa.

Kallon yace a arewa maso gabashin Najeriya kawai mutane sama da miliyan 13 ke zama a yankunan da ake fama da tashin hankali, kuma daga cikin su miliyan 8 da dubu 700 na bukatar agajin gaggawa.


Post a Comment

0 Comments