A Wata Shida An Sace Sama Da Mutum Dubu Biyu A Nijeriya -Rahoto

 

Bbc Hausa ta labarto cewa; a lissafi na tsakatsaki, an sace mutum 13 a kullum cikin wata shida na farkon shekarar 2021, a cewar wani bincike da cibiyar SBM Intelligence ta gudanar.

Jaridar TheCable wadda ta ga rahoton binciken, ta ruwaito cewa an gudanar da binciken ne daga watan Janairu zuwa Yuni.

Rahoton ya nuna cewa an yi garkuwa da jumillar mutum 2,371 a jiha 36 ciki har da Abuja, babban birnin ƙasar.

An samo ƙididdigar ce daga rahotannin da kafofin yaɗa labarai ke bayarwa da kuma manhajar bin diddigin harkokin tsaro ta Council of Foreign Relations.

'Yan bindiga sun nemi naira biliyan 10 a matsayin kuɗin fansa ya zuwa 30 ga watan Yuni. Sai dai bai bayyana ko nawa aka biya ba daga cikin kuɗin.

Rahoton wanda ya ce an fi yawaita sace mutane a watan Fabarairu (605), ya bayyana JIhar Neja a matsayin wadda aka fi satar mutanen inda aka yi garkuwa da mutum 643.