KUDURIN GURGUNTA YADA LABARAI: Jaridun Nijeriya Sun Yi Zanga-zanga Iri Daya A Fuskar Jaridunsu

 

 

A yau Litinin 12 ga watan Yulin 2021, Jaridun Nijeriya sun haɗa kai wajen wallafa abu iri ɗaya a shafukan farko na jaridunsu a matsayin nuna adawa kan wasu ƙudurin dokoki biyu da suke kallonsu a matsayin hanyar daƙile ƴancin faɗin albarkacin baki a ƙasar.

A shafukan sun wallafa hoton yaro da aka zana ƙarafan kurkuku a fuskarsu tare da rubuta "ƙin wallafa labarai."

Ƙudurorin dokokin na Majalisar Sanya Ido kan Jaridu NPC da kuma Hukumar Kula da Kafafen Yaɗa Labarai ta ƙasar NBC sun sanya tarar naira miliyan biyar ga ƴan jarida da gidajen yaɗa labarai waɗanda "ba sa tabbatar da gaskiya da ingancin ayyukansu."

Idan ƙuduran suka zama doka, za a ɗaure duk wanda aka kama da laifin tsawon shekara uku.

A watan da ya gabata shugaban kwamitin yaɗa labarai na majalisar Dattijai Sanata Ajibola Basiru, ya kare ƙudurin dokokin.