Masani Ya Bada Shawarar Cin Naman Zomo A Matsayin Rigakafin Wata Cuta

 



Daga Muhammad A. Dalhatu


MADOGARA ta labarto cewa; wani masani ya bayar da shawarar cin naman zomo ga masu shekaru 40 zuwa sama domin kariya daga kamuwa daga cutar ‘uric Acid’.

Dr Huzaifa Abdullahi, Likitan dabbobi a Asibitin Dabbobi na jihar  Bauchi, shi ne ya bayar da wannan shawarar a yayin  hirar da ya yi da Kamfanin Dillancin  Labaran Nijeriya, NAN, a ranar  Lahadi A Bauchi.

Dr Abdullahi ya tabbatar da cewa naman zomo na da sinadarai masu karfi na gina jiki, kuma naman na dauke da kitse mai kauri.  

“mafi yawan mutane ba su san yadda naman zomo yake da sinadaran gina jiki ba. Dabbar na da karancin cutarwa kuma tana hana mutum kamuwa da cutar ‘uric acid’”, inji shi.

A cewarsa sabanin shanu da sauran dabbobin gida, naman zomo yana  daya daga cikin dabbar dake da farin tsoka.

A cewar masanin idan al’umma suka yi amfani da shawarwarin masana wajen cin naman zomo hakan zai hana al’umma kamuwa daga cututtukan da dan Adam ke harbuwa da shi daga dabbobi.

Ya kara da cewa; “mutanen dake da shekaru daga 40 zuwa sama ana yawan samun su da cutar ‘uric acid’, kuma jan nama yana taimakawa wajen haifar da cutukan nan ga al’umma”, ya tabbatar.

A cewar Dr Abdullahi, cutar ‘uric acid’ na haifar da ciwon kafa kuma yana da hatsarin gaske ga rayuwar mutane.  


Post a Comment

0 Comments