Sojojin Nijeriya 183 Aka Kashe A Wata Shida Kacal - Rahoto

  Wasu ‘yan Nijeriya sun bukaci baiwa rundunonin sojin kasar goyan bayan da suke bukata saboda yaki da Yan ta’adda da masu aikata laifuffuka...

 

Wasu ‘yan Nijeriya sun bukaci baiwa rundunonin sojin kasar goyan bayan da suke bukata saboda yaki da Yan ta’adda da masu aikata laifuffuka da suke yi a sassan Najeriya wanda yayi sanadiyar hallaka sojojin 183 daga cikin su a cikin watanni 6 da suka gabata.

Wani binciken da Jaridar Daily Trust tayi yace tsakanin watan Janairu zuwa Yunin bana yace sojoji 183 suka mutu kuma akasarin su sun rasu ne a bakin daga lokacin da suke kokarin yaki da masu aikata laifuffuka domin kare lafiyar jama’ar kasa.

Rahotanni sun ce dubban sojojin Nijeriya yanzu haka da suka hada da sojin kasa da na sama da na ruwa ke aikin samar da zaman lafiya a jihohin kasar sama da 30 saboda tabarbarewar tsaron da ya addabi kasar.

Binciken jaridar yace akasarin sojojin da suka mutu sun rasa rayukan su sakamakon harin ‘yan bindiga da zauna gari banza da mayakan boko haram da ‘yayan kungiyar asiri da na ‘yan fashi.

Rahotan yace an kashe sojojin ne a sassa daban daban na Najeriya amma akasarin su sun mutu ne a yankin arewa maso gabas da ake yaki da kungiyar boko haram.

Binciken yace daga cikin sojoji 183 da aka kashe, kungiyar boko haram da ISWAP sun kashe 114 daga cikin su, yayin da 69 kuma suka mutu a wasu hare hare daban daban.

Jaridar ta bayyana jihohin da aka kashe sojojin da suak hada da Borno da Yobe da Jigawa da Kaduna da Niger da Nasarawa da Benue da Ebonyi da Enugu da Delta da Cross River da Rivers da kuma Bayelsa.

A ranar alhamis da ta gabata, Gwamnan Jihar Kebbi Atiku Bagudu ya sanar da cewar sojoji 7 suka mutu a jihar sa lokacin da suke fafatawa da yan bindiga a kauyen Marke, yayin da wasu 5 suka samu raunuka.

Jaridar ta ce a Yankin Kudu maso Gabas da Kudu maso Kudu ‘Yayan haramcaciyar kungiyar IPOB dake fafutukar kafa kasar Biafra da reshen ta dake dauke da makamai na ESN sun kashe sojoji da dama a hare haren da suke kaiwa a yankin.

Ko a wannan makon sanda sabon shugaban rundunar sojin kasa Laftanar Janar Faruk Yahaya ya ziyarci asibitin soji dake Kaduna domin duba sojojin da suka samu raunuka a filin daga.

Wani masanin harkar tsaro Kabiru Adamu ya shaidawa jaridar cewar rashin isassun kayan aiki na zamani da suka hada da rigar sulke da samun bayanan asiri na daga cikin abinda ke haifar da kisan sojojin.

Adamu ya ce wasu kayan aikin da dakarun Nijeriya ke amfani da su a yakin da suke da kungiyar boko haram basu da ingancin da ake bukata.

Wani jami’in Majalisar Dinkin Duniya Chukwuma Ume yace yaki a wannan zamani ya wuce amfani da bindiga kirar AK 47 saboda ci gaban zamani da aka samu.

Ume yace sojojin Najeriya na bukatar makamai na zamani da bayanan asiri wajen murkushe duk wadanda suka dauki makamai suna aikata laifuffuka.