Yadda Aka Saki Daliban Makarantar Bethel Baptist Da Akayi Garkuwa Da Su A Jihar Kaduna

 

Shugaban Kungiyar Kiristoci ta Nijeriya reshen jihar Kaduna, Joseph Hayab ya bayyana cewa, an sako daliban Makarantar Bethel Baptist, Demish, Kaduna da aka sace, bayan tsawon kwanaki 20 da suka shafe a wurin masu garkuwa da mutane.

Jaridar yanar gizo, TheCable ta ruwaito Hayab na bayyana haka a ranar Lahadi.

Kimanin Dalibai 121 ‘yan bindiga suka sace a dakunan Kwanan Dalibai na Makarantar a ranar 5 ga watan Yuli.

“Hayab bai tabbatar da adadin daliban da aka sako” inji Jaridar TheCable.

Kungiyar Baptist ta Nijeriya tuni ta gana da wasu Majami’un ta domin tattara kudaden da ‘yan bindiga suka bukata, domin sako daliban da aka sace a Makarantar Bethel Baptist High School a jihar Kaduna.

Idan dai ba a manta ba Jaridar Dimokradiyya ta baku rahoton cewa, a ranar 5 ga watan Juli Shekarar 2021, da Misalin karfe 2 na dare, Yan bindiga suka shiga Makarantar dake Karamar Hukumar Chikun tare da tafiya da wasu yara.

Jigon Makarantar wanda kuma shi ne shugaban Kungiyar Baptist ta Kaduna Reverand Ishaya Jangado ya ce kimanin dalibai 121 ‘yan bindiga suka sace, inda daga baya suka saki dalibi daya sakamakon rashin lafiya.

Bayan an tattauna, ‘yan bindigar wanda suka bukaci miliyan 100 da farko suka rage kudin ya zuwa naira miliyan 60.