Dakarun Amurka Da Jamus Sun Yi Musayar Wuta Da 'Yan Bindiga A Kabul

 

Sojojin Amurka da na Jamus sun yi musayar wuta da wasu 'yan bindiga da ba a san ko su waye ba a yau Litinin a filin jirgin saman Kabul babban birnin Afghanistan, lamarin da yayi sanadin mutuwar mutum 1 da jikkatar wasu 3kamar yadda RFI Hausa ta labarto.

Musayar wutar na zuwa ne a daidai lokacin da Amurka tare da kawayenta ke kokarin hanzarta kwashe dubban mutane daga Afganistan da suka hada da ‘yan kasarsu da wadanda suka yi aiki tare a kasar, kafin kungiyar Taliban ta sake karbe iko.

A ranar Lahadin da ta gabata ne dai rundunar sojan Amurka ta gargadi ‘yan kasarta da cewar su kauracewa kusantar filin jiragen saman a birnin Kabul saboda yiwuwar fuskantar barazanar tsaro.

Yanzu haka dai tirmitsitsin masu neman tserewa daga Afghanistan na ci gaba da karuwa a wajen filin jragen saman Kabul, a yayin da aka kwashe kimanin mutane dubu 30 daga kasar a karkashin jagorancin Amurka, tun lokacin da Taliban ta kwace iko da birnin na Kabul a ranar 15 ga Agusta.

'Yan Taliban, wadanda suka yi kaurin suna wajen tsattsauran ra’ayi kan aiwatar da shari'ar Musulunci a farkon mulkin su na tsakanin shekarun 1996 zuwa 2001, sun sha alwashin yin sassauci a wannan karon.