Kananan Hukumomi 10 Cikin 34 Na Fuskantar Hare-Haren’yan Bindiga A Katsina –Masari

Daga Ammar M. Rajab

Gwamnan jihar Katsina, Aminu Bello Masari a ranar Alhamis ya bayyana damuwarsa bisa matsalar tsaron da yake addabar jiharsa, inda ya tabbatar da cewa akalla kananan hukumomi 10 cikin 34 da ake da su a jihar, suna fama da hare-haren ‘yan bindiga da masu garkuwa da jama’a.

Ya tabbatar da cewa tabarbarewar ta’addancin ‘yan bindiga, masu garkuwa da jama’a, fyade da fashi da makami sun toshe duk wani kokarin gwamnati wajen tabbatar da zaman lafiya a jihar.

Masari, ya bayyana hakan ne a yayin da ya karbi bakuncin Shugaban Hafsan sojojin Nijeriya, Laftanar Janar Faruk Yahayaa gidan gwamnatin Katsina, inda ya nemi al’umma da hukumomin tsaro da su yi aiki tare wajen yaki da ayyukan ‘yan bindiga, masu garkuwa da jama’a da sauran batagari da suke jihar.

Ya ci gaba da cewa sojoji da sauran  hukumomin tsaro suna da bukatar kayan aiki da goyo baya wajen dakile ayyukan ‘yan bindiga da sauran matsalolin tsaro da yake addabar kasarnan, inda ya kara da cewa; yanzu duniya ta koma zamanin fasaha, domin haka; “ta hanyar fasaha, za ku iya yakin ku da jami’ai kalilan”.

Ya ce; “mu a nan Katsina, idan muka ce muna cikin farin ciki, ba mu fadi gaskiya ba. Muna cikin damuwa dangane da batun harin ‘yan bindiga da ya hada da garkuwa da jama’a, yi wa mata fyade wadanda ba su ji ba ba su gani ba, fashi da makami a manyan tituna.  Ina son a yi amfani da fasaha yadda ya kamata wajen kawo karshen ayyukan ‘yan bindiga.

 “Ba muna yaudarar kanmu ba ne na cewa za mu kawar da aikata laifi; ba a taba yin haka ba a baya, kuma ba za a yi shi a yau ba ko a gobe, amma zamu iya dakile shi ta yadda ba zai addabi rayuwar al’ummar ba kamar yadda yake faruwa a yau”, inji shi.

Masari ya ci gaba da cewa; “10 cikin 34 na kananan hukumomin jihar Katsina, duk suna karkashin munanan hare-haren ‘yan bindiga a kowacce rana. A don haka, da wannan a ranmu, babu dalilin da zai  sanya mu bacci. Wayarmu a koyaushe tana kunne domin mu rika jin me yake faruwa a wadannan kananan hukumomi. Kafin karin kumallon safe, an gaya min abin da ya faru da daddare. A takaice, ba ma jindadin yanayin da muke ciki, amma mungodewa Allah”.

Domin dakile matsalar, ya ce, gwamnatin jihar ta yi wa dokokin kananan hukumomi garambawul sannan ta samar da tsarin tsaro na mataki uku a jihar domin dawo da matsayin Sarakunan Gargajiya, addini, shugabancin matasa da mata wajen yaki da rashin tsaro a fadin jihar.

Tun da farko, Shugaban Hafsan sojojin Nijeriya, Laftanar Janar Yahaya, ya shaida wa gwamnan cewa yana jihar Katsina a wani ziyarar aiki domin duba rundunonin soji a karkashin runduna ta 8 ta sojojin Nijeriya, inda ya sha alwashin yin aiki tare da sauran ‘yan’uwansa hukumomin tsaro domin dakile rashin tsaro a jihar.