Gidan Man Fetur Na AU Sarki Global Ya Karyata Bidiyon Da Ake Yadawa

Hukumar gudanarwa ta Kamfanin gidan Man Fetur na AU Sarki Global ya karyata bidiyo da ake yadawa dangane da su, inda kamfanin ya ce bidiyo...

Hukumar gudanarwa ta Kamfanin gidan Man Fetur na AU Sarki Global ya karyata bidiyo da ake yadawa dangane da su, inda kamfanin ya ce bidiyon tsoho ne kuma tuni ma aka warware wancan matsalar da ta afku a lokacin.

Hukumar ta bayyana hakan ne a sanarwar da ta fitar da safiyar yau Juma’a inda suka bayyana bidiyon a matsayin labarin kanzon kurege.

Hukumar ta ce; “ku yi watsi da bidiyon da ake yadawa a halin yanzu a shafukan sada zumunta inda ake nuna jami’an DPR na gabatar da ma’aikacin AU Sarki Global a yayin da ake sayar da man fetur a Jarkoki da kuma leda”.

Sanarwar ta ci gaba da cewa; “domin tabbatar da sahihin zance, labarin tsohon labari ne, domin ya auku ne tun a cikin 2019 kafin lamarin tsaron da ake ciki ya ta’azzara harma gwamnati ta bada umurnin da ake a kai yanzu”, ta tabbatar.

Sun kara da cewa; “Gidajen Man Fetur dinmu na cika alkawura tare da kuma nuna goyon baya ga matakan da gwamnati ke dauka wajen magance matsalar tsaron da ya addabi jiharmu (Katsina)”.

“muna rokon al’umma baki daya da su dakatar da yada wannan bidiyo domin bayanan dake dauke da bidiyon ba gaskiya bane”, suka jaddada.