Gwamna El-Rufai Zai Rushe Gidaje 660 A Kaduna Nan Da Mako Uku

  Daga Ammar Muhammad A wata takarda da Hukumar tsara birane da ci gaba ta jihar Kaduna wato KASUPDA ta rabawa mutanen Unguwar Hayin Dan...

 

Daga Ammar Muhammad

A wata takarda da Hukumar tsara birane da ci gaba ta jihar Kaduna wato KASUPDA ta rabawa mutanen Unguwar Hayin Danmani dake jihar Kaduna, ta nemi da su kwashe tarkacensu dake Unguwar nan da kwanaki 21 idan ba haka ba gwamnatin za ta zo ta rusa gidajen dake Unguwar kuma su biya ladan rusawa.

Hukumar ta yi wa mazauna Unguwar gargadin ne a cikin wata takarda da ta raba musu mai dauke da kwanan watan 7 ga watan Satumban 2021.

Takardar mai dauke da lamba PS/OFF/COM/2004 ta shaida mazauna Unguwar Hayin Danmani Residential Layout (TPO689) cewa; gine-ginen an yi su ne ba bisa ka’ida ba domin Hukumar tsara Birane ta jihar Kaduna ba ta sahhale a yi gine-gine a wurin ba, wanda suka ce hakan ya sabawa dokar sashe na 27 sakin Layi na 1.

“Hukumomi sun lura cewa kun keta wurin Gwamnatin jihar Kaduna (TPO 689) Hayin Danmani Layout Kaduna ba bisa ka’ida ba, inda kuka yi gine-gine ba tare da samun takardar izinin haka daga KASUPDA ba wanda hakan ya sabawa dokar sashe na 27 (1)”, inji takardar kamar yadda MADOGARA ta samu kwafi.

Takardar ta ci gaba da cewa; “bisa wadannan hujjoji, mun ba ku kwana 21 daga kwanan watan da kuka sami kwafin takardar nan ta wa’adin tashi da ku cire dukkanin abubuwanku masu amfani a wurin, idan ba ku yi haka ba, hukuma ba ta da wani zabi da ya wuce mu rusa dukkanin gine-ginen da kayayyakin kuma ku biya ladan rusawa kamar yadda doka ta sashe 60 da 62 ta tanada”, suka tabbatar.

Isma’il Umar Dikko, Babban Daraktan Hukumar ta KASUPDA shi ne ya sanyawa takardar hannu a madadin gwamnatin jihar Kaduna.

Manazarta sun kiyasta cewa akalla akwai gidaje 660 a Danmani Kaduna, wanda idan gwamnati ta rushe Unguwar, Rusau din zai shafi akalla mutane 10,000.

 

Kwafen Takardar ke nan.