Lauyoyin Sheikh Abduljabbar Sun Janye Daga Wakiltarsa A Kotu

 


A yau Alhamis 16 ga watan Satumban 2021 ne aka dawo kotun dake gidan Sarki Kofar Kudu domin ci gaba da saurarar Shari'ar Sheikh Abduljabbar Kabara, sai dai a yau lauyoyinsa ba su zo ba, sai mutum daya daga cikin su, Barista Haruna Magashi wanda ya sanar da janyewa daga wakiltar Abduljabbar Kabara a kotun kamar yadda majiyarmu ta Jarida Radio ta tabbatar mana.

Jarida Radio ta labarto cewa; a baya kotun ta bada umarnin duba lafiyar kunnen Abduljabbar da kuma kwakwalwarsa, kuma an zo da sakamakon asibitin Murtala inda suka tabbatar da cewa kunnen Abduljabbar lafiya kalau yake.

Sannan rahoton asibitin Dawanau shima ya tabbatar da cewa Abduljabbar lafiyarsa kalau. Sai dai an taba bashi gado a asibiti ƙwaƙwalwa sanda suka taba fada da Dan uwansa ya yi kwana hudu asibitin amma a wannna lokacin ba a yi masa gwajin kwakwalwa ba, kuma ba a dora shi akan wani magani ba.

Dan uwansa Kasiyuni na daga waɗanda suka raka shi gwajin, kuma ya ce haka ba wani abu bane race jazaba ta mabiya darikar sufaye da akan samu da yawa daga cikin mabiya Sufanci da yin haka.

A halin yanzu Alkali Ibrahim Sarki Yola zai fadi matsayarsa kan bukatar lauyoyin na janyewar daga ƙarar.

Bayan saurarar rokon Lauyoyin Abduljabbar na janyewa daga kare shi, Alkali Sarki Yola ya tambayi Abduljabbar kan janyewar lauyoyin nasa:

Malam Abduljabbar Nasir Kabara ya ce a cikin tambayoyin da ya yi ma Lauyoyinsa suka kasa ba shi amsa, shi ne na yi kan hana shi magana a zaman kotun da ya gabata lokacin aka karanto masa sabbin tuhuma.

Lauyoyin Abduljabbar sun yi suka kan maganarsa, sannan suka nemi da a amince da bukatarsu na janyewa.

Alkalin ya amince da bukatar janyewar Lauyoyin Abduljabbar na janyewa daga kare Abduljabbar a shari’ar.


Post a Comment

0 Comments