WATA SABUWA: Lauyoyin Sheikh Abduljabbar Za Su Maka Shi A Kotu

 


Daga Wakilinmu

 A wani abu mai kama da Baraka ce ta shiga tsakanin Sheikh Abduljabbar Nasiru Kabara da Lauyoyinsa wanda ta kai ga a zaman shari’ar da aka yi a yau Alhamis suka sanar da kotu cewa sun janye wakiltarsa da suke yi, wata sabuwa ta bullo bayan kammala shari’ar ta yau wacce aka dage aka sanya ranar 30 ga watan Satumban nan domin ci gaba da shari’ar.

Barista Rabiu Shu'aibu Abdullahi wanda yake jagorantar tawagar Lauyoyin Sheikh Abduljabbar a baya kafin su janye ya ce sun bai wa Shehin Malamin mako biyu ya yi karar su a hukumance bisa zarge zargen da ya yi musu a zaman kotu da aka yi yau, idan kuma ba haka ba za su dauki matakin shari’a a kansa.

Jarida Radio ta labarto cewal Barista Rabiu ya musanta dukkan zarge zargen da Sheikh Abdujabbar yayi musu a kotu yau. Ya kuma shaida cewa ba za su bayyana mene ne ya sa suka janye daga shari'ar ba, domin ya saɓa da dokar aikin su na Lauyoyi su bayyana abin da ya faru na saɓani tsakanin su da wanda suke wakilta.

Ya kara da cewa akwai bangare na musamman da Shari'a ta ware da wanda suke wakilta zai iya kai ƙarar Lauyoyinsa bisa sauka daga tsarin aiki da suka yi.

A yau ne Sheikh Abduljabbar ya bayyana wasu tuhume tuhume akan Lauyoyinsa a kotu bayan an tambaye shi kan janyewarsu daga kare shi.

Sheikh Abduljabbar ya ce yana zargin Lauyoyinsa sun cinye kudi da suka ce za su yi hira da ‘yan jarida domin ya bayyana musu al'amura game da shari'ar da ta gabata a ranar 2 ga watan Satumba, sannan kuma sune suka sa shi ya yi shiru a zaman da aka yi na baya lokacin da Alƙali ya tambaye shi game da sababbin tuhumomin da ake yi masa.

 


Post a Comment

0 Comments