Yau Al'ummar Musulmi ke bikin ranar Maulidin Fiyayyen Hallita (SAWW) a sassan Duniya


Yau talata 19 ga watan Oktoba al’ummar Musulmi a sassan Duniya ke bikin murnar zagayowar ranar 12 ga watan Rabi’ul Awwal ranar da ake dangantawa da haihuwar fiyayyen halitta Annabi Muhammad tsira da amincin Allah su kara tabbata a gareshi.

Yayin bikin Mauludin dai bisa al’ada Musulmin galibi mabiya Sufaye kan yi dafifi tare da yawaita zikiri salatin Annabi baya ga mabanbantan kasidun yabo ga fiyayyen halitta, inda a bangare guda Iyaye kan yiwa yaransu sabbin dinkuna yayinda mawadata kan yanka raguna da shanu baya ga girke-girken alfarma don hidimar ranar da ake yiwa gagarumin biki.

Kalmar ta Mauludi wadda ta samo asali daga Larabci da ke nufin ‘‘haihuwa’’ a wasu yarukan na da sunaye daban kamar Havliye ko Donba ko kuma Gani, tarihi ya nuna cewa an fara bikinta ne don tunawa da haihuwar fiyayyen halitta Annabi Muhammadu Sallallahu Alaihi wa sallam tun daga shekarar 1207 a Iraqi bisa jagorancin Muzaffar al-Din Gokburi dan uwa ga shugaban daular Ayyubid sultan Saladin da ke jagorancin daular musulunci a wancan lokaci.

Bayan daular ta Ayyubid daular Ottaman ta taimaka wajen tabbatar da bikin a kowacce shekara cikin kasashen musulmi, inda ranar ta 12 ga watan Rabi’ul Awwal ke matsayin gagarumin biki har bayan gushewar daular inda bikin yafi samun karbuwa a kasashe irin Turkiya da Masar da Iraqi da Syria da Pakistan da India da Malaysia da Indonesia sai kuma kasashen Afrika inda Najeriya da Senegal ke kan gaba.

Kusan dukkanin kasashen Duniya da Musulmi ke da rinjaye na gudanar da bukukuwan na Mawludi tare da bayar da hutun ranar a kowacce shekara don gudanar da shagulgula in banda kasashen Saudiya da Qatar wadanda ke kallon bikin a matsayin lamarin da ba karbabbe ba a addinin Islama.

-Rfi Hausa

Post a Comment

0 Comments