Kafar Watsa Labarai Ta MADOGARA Ta Nada Sabon Edita


Daga Muhammad Farouk

Kafar watsa labarai ta MADOGARA TV/RADIO mai shafin Intanet a www.madogara.com.ng ta nada Ammar Muhammad Rajab a matsayin Editan kafar.  Aikin na shi a hukumance ya fara ne daga watan Nuwamban shekarar da muke ciki.

Nadin dan jaridar a matsayin Edita ya biyo bayan sabbin gyare-gyaren da kafar ta dauko domin inganta aikinta a fagen watsa labarai na zamani.

Bayan tabbatar da shi a matsayin Edita, Ammar Muhammad Rajab ya wallafa a shafinsa na Facebook cewa; “a hukumance na fara aiki da kafar watsa labaran zamani ta MADOGARA ( www.madogara.com.ng )  Zan yi aiki da kafar a matsayin Edita”.

“Ayyukana shi ne rubuta labari, tsarawa da kuma kula da hanyoyin isar da su, tare da  jagorantar marubuta, masu fassara, ƴan jaridar zamani, masu tace rubutu, da masu zanen hoto, sanya idanu kan ayyuka daban-daban da aka yi, tare da kuma gyara rubutu domin tabbatar da ya bi ka'ida da salo bisa doron ka'idodin aikin jarida”, ya lurantar.

“Kafar watsa labaran na da sashen Turanci da Hausa, zan yi aiki a sashen Hausa. Insha Allah a shirye nake na fuskanci wannan sabon kulen aikin jarida na zamani”, ya jaddada.

Ammar Muhammad Rajab ya kwashe akalla shekaru 10 yana aikin Jarida. Ya fara aikin jarida ne da jaridar ALMIZAN. Sannan ya yi aiki da kafafen watsa labaran na cikin gida da na waje da suka hada; LEADERSHIP A YAU (Abuja), Dimokuradiyya (Kaduna), Tarayya (Kaduna), Tamola (Kaduna), THE MAIL ONLINE PUBLISHERS LTD (Abuja), Almahdi TV (Pakistan), MADUBI (Abuja), NaijaFox (Iran), Nigeria21 (Iran), EDUCATION MONITOR LTD (Abuja/Keffi).

MADOGARA kafar watsa labarai ce da wasu zakakuran ‘yan jarida suka bude a matsayin mai zaman kanta wacce za ta rika yada labarai da rahotanni na gaskiya da kuma muhimman bayanai. Kafar na watsa ayyukanta bisa tsare-tsare da dokoki irin na aikin jarida. 


Za ku iya bibiyar kafar watsa labaran a wadannan shafuka kamar haka;

Facebook: Madogara TV/Radio

Twitter: @Madogaratv

Website: www.madogara.com.ng

WhatsApp: 09121740284

Post a Comment

0 Comments