Matashi Ya Mutu A Hannun Ƴan Bijilanti A Jigawa Bayan Mahaifinsa Ya Kaishi A Yi Masa Hukunci

Wani matashi mai suna Haruna Auwala ya rasu a ofishin ƴan bijilanti bayan da mahaifinsa, Auwala Ado ya kai shi a yi masa hukunci...

Wani matashi mai suna Haruna Auwala ya rasu a ofishin ƴan bijilanti bayan da mahaifinsa, Auwala Ado ya kai shi a yi masa hukunci sabo da ya kangare kamar yadda majiyarmu ta Daily Nigerian ta labarto.

Lamarin ya faru ne a ƙauyen Kafin Gana da ke Ƙaramar Hukumar Birnin Kudu da ke Jihar Jigawa.

Tun da fari dai shi Auwala na zargin ɗansa da satar masara a gonar mutane, inda sakamakon ɓacin rai, sai ya kai shi ofishin ƴan bijilanti da a ka fi sani da ƴan bulala domin a hukunta shi.

Bayan ya kai marigayin, sai ƴan bulala ɗin su ka hukunta shi ta hanyar ba shi gwale-gwale inda daga nan ne sai jikinsa ya rikice har a ka garzaya da shi asibiti.

Bayan an kai shi asibiti ba da daɗewa ba ne sai kuwa Haruna ya ce ga garinku nan.

Kakakin Rundunar Ƴan sanda ta Jihar Jigawa, ASP Lawan Shiisu Adam ya tabbatar da faruwar al'amarin.

Kakakin ya kuma tabbatar da cewa tuni su ka cafke mahaifin marigayin da kuma wani mutum guda ɗaya sannan za a faɗaɗa bincike.

Ya kuma yi kira ga iyaye da su riƙa yiwa ƴaƴansu hukunci mai sauƙi domin gujewa nakasa ko ma rasa rai baki ɗaya.