Muna Farin Cikin Cire Nijeriya Daga Jerin Masu Tauye 'Yancin Addini , Inji Lai Mohammed

 

Gwamnatin Tarayyar Nijeriya ta yi lale marhabin da matakin gwamnatin Amurka na cire kasar daga sahun wadanda take yi wa kallon masu tauye ‘yancin yin addini.

A cikin wata sanarwa da ya fitar, Ministan Yaɗa labarai da al’adu na Nijeriya, Alhaji Lai Mohammed ya kira matakin na Amurka da adalci.

Rahotanni sun nuna cewa a jiya ne Amurkar ta cire sunan kasar daga jerin ƙasashen da take zargi da tauye yancin addini kwana ɗaya kafin Sakataren Harkokin Wajen Amurka Antony Blinken ya isa Nijeriyar a yau Alhamis.