Shugaba Bazoum Na Nijar Ya Ziyarci Inda Aka Kashe Mutum 69

Shugaban Nijar Mohamed Bazoum ya kai ziyara garin Banibangou yankin Tillaberi domin jajantawa al’ummar yankin kamar yadda BBC ta labarto.

 

A ranar Alhamis gwamnatin Nijar ta ayyana zaman makoki na kwana biyu domin jimamin kashe mutum 69 a harin da mayaƙa masu iƙirarin jihadi suka kai a Banibangou da ke kusa da kan iyaka da Mali.

Bazoum ya ce ziyara ce da ta zama dole gare shi bisa abin da ya faru.

"Aiki na ne a lokaci irin wannan na zo da kaina na taya ku jaje,” kamar yadda shugaban ya bayyana a cikin wata sanarwa da ya wallafa a shafinsa na Facebook.

Shugaban ya ce ya kai ziyarar ne a madadin al’ummar Nijar tare da yi wa al’ummar yankin alƙawalin cewa gwamnati za ta yi ƙoƙarin gano bakin zaren magance matsalolin tsaro a yankunan da ke kan iyaka.

Yankin da ke kan iyaka da Nijar da Mali da Burkina Faso ya sha fuskantar hare-hare daga mayaƙan da ke da alaƙa da ƙungiyoyin IS da kumna Al Qaeda.