Tsoffin Mayakan Boko Haram Sun Yi Bore A Sansaninsu Dake Borno

 


Daruruwan tsoffin ‘yan kungiyar Boko Haram da suka tuba suka gabatar da kansu ga dakarun Nijeriya sun yi zanga-zanga a sansanin da aka ajiye su da ke kusa da Maiduguri a jihar Borno.

Tsoffin mayakan kungiyar ta Boko Haram na bukatar a ba su damar yanka shanu domin samun nama da za su ci.

Sun yi boren ne dauke da makamai da suka hada da adduna, gatari da sanduna suna barazanar kashe duk wanda ya fice daga sansanin da aka jibge su a lokacin boren.

Wannan na nuna irin gagarumin aikin da Hukumomin kasar ke yi domin sauya ra'ayoyin tsoffin mayakan kungiyar ta Boko Haram domin su iya zama cikin al’umma bayan da aka kwashe shekaru 12 ana fafata yaki da su.

Kimanin tsoffin mayakan  kungiyar Boko Haram 250 da suka hada da maza da mata da kananan yara, wadanda aka tsugunar a Unguwar Gidan Taki dake bayan garin Maiduguri suka shiga boren.

Majiyoyin samun labarai  na cewa yayin boren tsoffin mayakan kungiyar Boko Haram sun farfasa taga da kofofin gidajen da ke sansanin da aka ajiye su kamar yadda RFI ta labarto.

 

Post a Comment

0 Comments