Yajin Aikin ASUU: Majalisa Ta Shiga Tsakani

Majalisar wakilai ta umarci kwamitin harkokin ilimi da ya binciki barazanar yajin aikin da kungiyar malaman jami'o'in su...

Majalisar wakilai ta umarci kwamitin harkokin ilimi da ya binciki barazanar yajin aikin da kungiyar malaman jami'o'in suka yi, tare da gabatar da rahoto ga majalisar.

A ranar Litinin ne kungiyar malaman ta bai wa gwamnati wa’adi kan ta mutunta yarjejeniyar da suka kulla ko kuma su shiga yajin aiki.

Wasu 'yan majalisa a zaman na yau sun bukaci a yi kira ga gwamnatin tarayya ta gaggauta daukar duk wasu matakan da suka dace, don bude wata tattaunawa ta gaskiya da ASUU domin kaucewa shiga yajin aiki.

A cewar shugaban kwamitin harkokin ilimi mai zurfi na majalisar Honorabul Aminu Sulaiman Goro, tuni sun aike wa bangarorin biyu takardar neman shiga tsakani domin kawo karshen tirka-tirkar da ta dade tana faruwa tsakaninsu.

Kungiyar ASUU ta sha daukar matakin zuwa yajin aiki, a duk lokacin da suka samu rashin jituwa da gwamnatin Nijeriya, wanda hakan na haifar da tsaiko ga karatun daliban jami'o'i a kasar.