An Cafke Mahaifin Da Ya Yi Sanadiyyar Mutuwar Jariri Bayan Ya Karbi Haihuwarsa Ta Youtube

Daga Umar Shuaibu An kama wani mutum a kasar Indiya bayan da ya yi sanadiyyar mutuwar jaririn da matarsa ta haifa.  R. Loganatha...

Daga Umar Shuaibu

An kama wani mutum a kasar Indiya bayan da ya yi sanadiyyar mutuwar jaririn da matarsa ta haifa. 

R. Loganathan mai shekaru 34 daga Tamil Nadu, da matarsa L. Gomathi suna sa ran samun jaririn a ranar 13 ga watan Disamba, amma an samu jinkiri sai ranar 18 ga watan Disamba matar ta fara nakuda.

Loganathan ya nemi taimakon 'yar uwarsa Geetha, kuma ya yi ƙoƙarin karbar haihuwar matar ta shi tare da taimakon wasu bidiyon koyarwa a YouTube. A dalilin haka jaririn ya rasu yayin haihuwar, ita kuma mahaifiyar jaririn ta rasa jini mai yawa. 

An kwantar da matar a Cibiyar Kula da Lafiya a matakin Farko ta Punnai cikin mawuyacin hali, jim kadan bayan haka aka maida ita zuwa Asibitin Kwalejin Kiwon Lafiya ta gwamnati da ke Vellore. 

"Za a dauki tsauraran matakai kan irin wadannan ayyuka da ke jefa rayuwar uwa da jariri cikin haɗari. Kuma za a ƙara fadakar da al'umma dangane da haihuwa cikin sauki a asibiti." Inji D. Bhaskara Pandian, Jami'in da ke kula da Gundumar Ranipet.