Cutar Korona Na Barazanar Kassara Tsarin Kiwon Lafiya - WHO

  Hukumar lafiya ta Duniya WHO, ta yi gargadin cewa sabon nau’in cutar Korona na Omicron na iya kassara tsarin kiwon lafiya a sassan duniya,...

 

Hukumar lafiya ta Duniya WHO, ta yi gargadin cewa sabon nau’in cutar Korona na Omicron na iya kassara tsarin kiwon lafiya a sassan duniya, duk da cewa binciken farko ya nuna yana nau’in Koronar na Omicron,  ba shi da tsanani kamar sauran nau’ikan annobar.

Rahoton RFI ya ce; hukumar WHO ta yi wannan gargadi ne a yayin da China da kasashen Turai da kuma Amurka suka dawo da tsauraran matakan dakile yaduwar Korona, sakamakon hauhawar masu kamuwa da cutar.

A kasar Amurka gwamnati ta rage lokacin killace wadanda suka kamu da cutar Korona da basu tagayyara ba domin warware matsalar cinkoso a asibitoci.

A Faransa kuwa inda aka ga hauhawar masu Korona da adadin mutane fiye da dubu 100 a baya baya nan, gwamnati ta umarci hukumomi da kamfanoni da su sa ma'aikata su yi aiki daga gida tsawon akalla kwanaki uku a mako.

Ita kuwa Jamus ta maido ne da dokar takaita walwala ta hanyar rufe wuraren shakatawa na dare, da kuma tilasta gudanar da wasanni ba tare da ‘yan kallo ba.

Duk da fuskantar karancin barkewar cutar idan aka kwatanta da wuraren da annobar ke sake yin kamari a sassan duniya, kasar Sin ba ta sassauta matakan dakile yaduwar Koronar ba, inda a baya bayan nan ta maida dokar kulle a sassa da dama na birnin Yan'an, mataki mafi tsauri da ta dauka bayan garkame birnin Wuhan da ta yi a farkon barkewar annobar.

Alkaluma sun nuna sabon nau’in Korona na Omicon shi ne yayi tasiri wajen karuwar masu kamuwa cutar a akasarin kasashen musamman na Turai, inda a baya bayan nan Netherlands da Switzerland suka tabbatar da cewar Omicron din ne ya zarce sauran nau’ikan Koronar yawaita a cikinsu, yayin da kuma Girka ta ba da rahoton gano mutane dubu 21,657, da suka harbu da annobar cikin rana guda.