Omicron Ta Rage Armashin Bikin Kirismati A Bana

 

Miliyoyin  al’umma a sassan duniya na shirin gudanar da bikin Kirismati a daidai lokacin da sabon nau’in cutar Korona na Omicron ke ci gaba da yaduwa, lamarin da ake ganin zai rage armashin bikin a bana.

RFI ta labarto cewa; kodayake akwai mutane da dama da za su gudanar da bikin na Kirismati a killace a gidansu domin kauce wa kamuwa da annobar ta Korona, nau’in Omicron wanda aka ce yana da wuyan sha’ani.

Shekaru biyu kenan jere da juna da wannan annoba ta Korona ke haifar da cikas ga bikin na Kirismati.

A can Bethlehem kuwa, wurin da mabiya addinin Kitrista suka yi amanna cewa, nan ne mahaifar Annabi Isa Alaihi-s-salatu wassalam, masu gidajen otel-otel sun shiga damuwa saboda karancin baki da cutar ta Korona ta takaita adadinsu a bana, yayin da kuma Isra’ila ta rufe kan iyakokinta.

A tsakar daren yau Juma’a, wato jajibirin ranar bikin na Kirismatin, tsirarun mutane ne za su gudanar da taron addu’a a birnin na Bethlehem, al’amarin da ba a saba ganin haka ba.

Gwamnatocin kasashen Turai sun kafa wasu tsauraran ka’idojin yaki da cutar ta Korona, lamarin da ya rage wa bikin na Kiristamatio armashi.

Kasashe irinsu Netherlands da Spain da Italiya duk sun wajabta sanya takunkumin rufe baki da hanci musamman a bainar jama’a da zummar takaita yaduwar annobar a lokacin bikin na Kirismati.