'Yan Daba 'Sun Kai Hari' Wurin Taron PDP A Zamfara

 


 Wasu 'yan daba sun kai hari filin da jam'iyyar PDP take gudanar da zabukan shugabanninta a Gusau, babban birnin jihar Zamfara.

Gidan talbijin na Channels ya rawaito cewa tun da fari an so a gudanar da taron a Zaitun Oil mill, da ke bayan hukumar alhazai amma aka sauya zuwa Command Guest House da ke Gusau.

Rahotanni sun ce 'yan dabar siyasa sun yi wa wurin dirar-mikiya da sanyin safiyar Litinin inda suka lalata kayan zabe da fom-fom da motocin 'yan jam'iyyar PDP da kuma kujeru sannan suka cinna wuta kan rumfunan da aka kafa.

Hotunan da aka rika watsa a shafukan intanet sun nuna yadda wurin ya kama da wuta bayan an yi kaca-kaca da shi.

Rahotanni sun ambato Umar Aminu, wani hadimin mataimakin gwamnan Zamfara, Mahdi Aliyu Gusau, yana cewa babu wanda ya isa ya yi musu barazanar da za ta kai su fasa gudanar da taron.

An soma zaman doya-da-manja tsakanin Gwamna Mohammed Matawalle da mataimakinsa tun bayan gwamnan, wanda aka zaba a karkashin jam'iyyar PDP, ya sauya sheka zuwa jam'iyyar APC.

Post a Comment

0 Comments