Ina Da Kwarewar Jagorantar Kasar Nan Zuwa Tudun Muntsira -Saraki



Daga Bello Hamza, Abuja

Tsohon Shugaban Majalisar Dattawa, kuma daya daga cikin na gaba-gaba cikin masu neman jam’iyyar PDP ta tsayar da su takarar shugabancin kasar nan, Dakta Abubakar Bukola Saraki, CON, ya bayyana cewa, yana da sanin makaman aiki da kwarewar da ake bukata na jagorantar kasar nan tare da warware matsalolin da ake fuskanta. Saraki ya yi wannan bayanin ne a cikin jawabinsa a taron manema labarai da wakilan jam’iyyar PDP daga jihohin tarayya Nijeriya ranar Alhamis a Abuja.

Ya ce, zaben shekarar 2023 nada matukar muhimmanci ga dukkan ‘yan Nijeriya, musamman ganin irin dinbin matsaloli da kalubalen da kasar ke fuskanta, a kan haka ya ce, yana da kyau a tabbagtar da an zabi jajirtacce wanda zai iya fuskantar matsalolin tare da samar da hanyoyin fita daga matsalar ba tare da rikicewa ba, ‘A don haka na kira wannan taron don in sanar daku dalilin da ya sa na shiga wannan takarar da kuma irin kwarewa na a fagen harkokin rayuwar al’umma Nijeriya’’ in ji shi.

Ya kuma bayyana irn nasarorin da ya samu a lokacin mulkinsa na gwamnan Jihar Kwara, inda ya samar da ingantacen tsarin kiwon lafiya ga al’umma jihar, “Za mu yi amfani da irin wannan samfurin wajen ganin ‘yan Nijeriya suna samun ingataciyar kiwon lafiya a dukkan matakai na gwamnati.

Daga nan ya kuma yi tilawar irin nasarorin da ya samu a zamansa na shugaban majalisar dattawa, inda suka tabbatar da bangaren gwamnati na aiwatar da ayyukansu yadda ya kamata, ta yadda al’umma za su amfana, “Dukkan matsayin dana samu kai na a baya, na yi kokarin gudanar da ayyukan da za su amfani jama’ar kasa” in ji shi.

Daga karshe ya ce, “Zan zama tsani tsakanin matasa da dattawa, tsakanin Musulmai da Kiristoci, tsakanin Arewa da Kudu saboda ni cikakken dan Nijeriya ne” in ji shi.

Taron dai ya samu halartar ‘yan jarida daga kafafen watsa labarai da daman a ciki da wajen kasarnan.

Post a Comment

0 Comments