Jami'ar Maryam Abacha Ta Sanyawa Makarantar Kwamfuta Sunan Farfesa Pantami

Jami’ar Maryam Abacha American University ta Nijeriya (MAAUN) da ke Kano, ta sanya wa Makarantar Kwamfuta sunan Ministan Sadarwa da Tattal...

Jami’ar Maryam Abacha American University ta Nijeriya (MAAUN) da ke Kano, ta sanya wa Makarantar Kwamfuta sunan Ministan Sadarwa da Tattalin Arziki na zamani na Nijeriya, Farfesa Isa Ali Ibrahim Pantami.

Shugaban Jami’ar kuma wanda ya kafa Jami’ar, Farfesa Adamu Abubakar Gwarzo ya shaida wa PRNigeria cewa matakin na daya daga cikin kokarin da Jami’ar ta ke yi na ganin ta shaida bajintar da Farfesa Pantami ya yi a matsayin minista a majalisar shugaban kasa Muhammadu Buhari.

“A matsayinsa na ma’aikacin da ya biya hakkinsa a aikin gwamnati kuma wanda ya kawo sauyi ga tattalin arzikin kasar nan ta fuskacin fasaha, tabbas ya cancanci masu tasowa su yi koyi da shi, a don haka kasancewarsa a fannin da ya yi fice a cikinsa, mun ga ya dace mu sanya wa makarantarmu ta kwamfuta sunansa." Gwarzo yace.

MAAUN jami'a ce mai zaman kanta da ke cikin tsohon birnin Kano, wacce aka sadaukar domin samarwa ɗalibai mafi kyawun ilimi, zamantakewa da gogewa.

Makarantar ta kwamfuta tana ba da kwas a bangaren Tsaron Intanet (Cybersecurity), Fasahar Sadarwa (Information Technology), Injiniyan Software (Software Engineering) da Kimiyyar Kwamfuta (Computer Science).

Idan za ku iya tunawa a watan Fabarairu, Kamfanin Image Merchants Promotions Limited (IMPR), mawallafan PRNigeria da Economic Confidential sun kafa taron bayar da lambar yabo na shekara-shekara ga mafi kwazon daliban da suka kammala karatun digiri na farko a fannin hulda da jama'a da tattalin arzikin zamani (Digital Economy) a Jami'ar Bayero Kano (BUK).

Kyaututtukan wanda aka sanyawa sunan tsohon shugaban sashen Sadarwa na jami’ar, Farfesa Bashir Ali da kuma ministan sadarwa da tattalin arziki na zamani, Isa Ali Pantami zai shafe shekaru 10 daga 2022 zuwa 2032 ana gudanar da shi.

An ƙaddamar da kyaututtukan ne domin ƙarfafawa ɗalibai domin su haɓɓaka sha'awarsu ga aikin sashen Hulɗa da Jama'a da kuma bangaren kirkira a ayyukan fasahar zamani waɗanda ke da muhimmanci ga bunkasar tattalin arzikin duniya na yau.

A lokacin da yake karbar shaidar kudi na Naira Miliyan daya na kyaututtukan a ofishinsa, Mataimakin shugaban Jami’ar BUK, Farfesa Sagir Adamu Abbas ya yabawa Kamfanin IMPR kan yadda take gudanar da ayyuka daban-daban na horar da dalibai da matasa da kuma masu wayar da kan jama’a kan fasahar zamani. Ya kara da cewa za a ba da kyaututtukan ne ga dalibai na farko a yayin taron da ke tafe na yayen dalibai na shekarar 2022.

Hakazalika, Ma’aikatar da kuma Hukumar Bunkasa Fasahar Sadarwa ta Kasa (NITDA), dukkansu sun samu lambar yabon 2022 SABER African PR Certificate of Excellence.

Kyautar PR din na shekara-shekara na African PR na shaida nasarori da kuma hulda (SABRE) Kamfanin Provoke Media (Holmes Report a da) tare da haɗin gwiwar Ƙungiyar Hulɗa da Jama'a ta Afirka (APRA) ke shirya taron.

Za a yi bikin bayar da kyautar ne a Dar es Salaam, Tanzania a ranar 25 ga watan Mayu, a wani bangare na taron hulda da jama'a na Afirka na 2022.