MAAUN Ta Sake Rattaba Hannu Kan Wata Yarjejeniya Don Haɓɓaka Tsarin Hulɗa Da Kasashen Duniya

 


A ranar Juma’a ne Jami’ar Maryam Abacha American University ta Nijeriya (MAAUN) dake Kano, ta sake rattaba hannu kan wata yarjejeniyar fahimtar juna da jami’ar Mezan-Tepi (MTU) dake kasar Habasha, a wani bangare na kokarin bunkasa hulda da kasashen duniya.

Rattaba hannu kan yarjejeniyar da aka yi ta Intanet, an tsara shi ne don inganta hadin gwiwa tsakanin jami'o'in biyu a fannin shirin musayar kwasa-kwasai da aikin binciken kimiyya da dai sauransu.

A nasa jawabin a taron, shugaban Jami’ar MAAUN, Farfesa (Dr) Muhammad Israr, ya ce manufar kulla alakar wannan yarjejeniya ita ce samar da hadin gwiwa da nufin baje kolin jami’ar ga sauran jami’o’in duniya.

A cewarsa, yarjejeniyar za ta kuma bai wa MAAUN damar hadin gwiwa da jami’ar Mezan-Tepi a fannin koyar da dalibai da musayar shirye-shirye.

A nasa jawabin, shugaban Jami'ar Mezan-Tepi ta Habasha, Dr Ahmed Mustofa ya ce jami'ar da ke daya daga cikin manyan jami'o'i 10 a kasar Habasha, za ta samar da tsarin da ake bukata domin aiwatar da yarjejeniyar fahimtar juna.

“Jami’ar da ke da cibiyoyi uku masu dauke da dalibai sama da 80,000 za ta tabbatar da cewa yarjejeniyar ta karfafa hadin gwiwa don samar da musayar dalibai, tarurruka da karawa juna sani da sauransu.

Shima a nasa jawabin, mataimakin shugaba a bangaren tabbatar da ingancin ilimi, Dr Nura A. Yaro ya ce MAAUN ta ga ya zama dole ta kulla hulda da kasashen duniya domin babu wata Jami’a da ta tsira ita kadai.

Ya ce yarjejeniyar fahimtar juna ta shafi muhimman fannoni guda uku da suka hada da bincike mai zurfi da ke da nasaba da kyakkyawan sakamako, sannan zai kuma amfani jami’ar domin duk hadin gwiwar ta shafi cin moriyar juna ne kamar shirin musayar dalibai.

Ya bayyana fatan cewa, jami'ar Mezan-Tepi za ta tabbatar da aiwatar da yarjejeniyar ta yadda ya kamata, ta yadda za a samu ci gaba mai dorewa da hadin gwiwa a tsakanin bangarorin biyu.

“A matsayin daya daga cikin jami'o'i masu zaman kansu mai saurin karbuwa tare da dalibai sama da 900, ma'aikatan ilimi 40 da ma'aikata masu tallafawa 165, muna fatan samun kyakkyawan sakamakon wannann haɗin gwiwar," in ji shi.

Shima da yake nasa jawabin, mataimakin shugaba akan harkokin mulki/rajista, Dr Habib Uwais wanda Dr. Abdullahi Garba ya wakilta ya ce MAAUN na da duk wani abu da ake bukata na kulla alaka mai karfi da sauran jami’o’in duniya domin bunkasa bincike tare da kara habbaka. tsarin huldar kasa da kasa.

Taron rattaba hannu kan yarjejeniyar fahimtar juna ya samu halartar Injiniya Bashir Garba, Shugaban ofishin MAAUN na huldar kasa da kasa.


Post a Comment

0 Comments