Farfesa Gwarzo ya jajantawa Masarautar Dutse, Gwamnatin Jigawa Bisa Rasuwar Sarki Nuhu Muhammadu Sanusi

Wanda ya assasa kuma shugaban majalisar gudanarwa na Jami’ar Maryam Abacha American University ta Nijeriya (MAAUN), dake Kano, Farfesa Ada...

Wanda ya assasa kuma shugaban majalisar gudanarwa na Jami’ar Maryam Abacha American University ta Nijeriya (MAAUN), dake Kano, Farfesa Adamu Abubakar Gwarzo ya mika sakon ta’aziyyarsa ga masarautar Dutse da gwamnatin jihar Jigawa bisa rasuwar mai martaba Sarkin Dutse, Dr. Nuhu Muhammadu Sanusi.

Sanusi mai shekaru 79 ya rasu ne a ranar Talata a wani asibiti da ke Abuja bayan ya yi fama da gajeruwar rashin lafiya.

Sakon ta’aziyyar na kunshe ne a cikin wata sanarwa da Farfesa Gwarzo ya sanya wa hannu kuma aka mika wa manema labarai a Kano a ranar Juma’a.

Farfesa Gwarzo, wanda shi ne har wala yau Shugaban Kungiyar Jami’o’in Masu Zaman Kansu na Afrika (AAPU) ya bayyana cewa tabbas Jihar Jigawa ta yi babban rashin mutum mai daraja wanda yake jagora ne da daukacin al’ummar masarautarsa ​​ke kaunarsa saboda tawali’unsa.

Ya bayyana rasuwar sarkin a matsayin babban rashi ba kawai ga iyalansa ba, masarautar Dutse da jihar jigawa kadai ba, har ma da kasa baki daya.

“A madadin Jami’ar Maryam Abacha American University ta Nijeriya da Nijer, ina mika sakon ta’aziyyarmu ga gwamnati da al’ummar Jihar Jigawa bisa rasuwar Sarki.

“Allah Madaukakin Sarki ya jikan marigayin ya kuma sanya shi a Al-Jannah Firdaus, sannan ya kuma bai wa iyalai da al’ummar masarauta da daukacin al’ummar jihar hakurin jure wannan babban rashi da aka yi,” inji shi.

Farfesa Gwarzo, wanda kuma ke dauke da Sarautar Wazirin HausawanTurai, ya bayyana marigayin a matsayin mutum mai tawali’u kuma mai son zaman lafiya, wanda ya ba da gudunmawa sosai wajen ci gaban yankinsa.

Tuni dai aka yi jana’izar marigayi Sarkin, wanda shi ne shugaban Jami’ar Jihar Sakkwato da ke Sakkwato na farko, kamar yadda addinin Musulunci ya tanada.